रत्नागिरी : रत्नागिरीतील श्रीमान गंगाधर गोविंद पटवर्धन इंग्रजी माध्यम शाळेतील (जीजीपीएस) विद्यार्थ्यांनी २७ डिसेंबर २०१९ रोजी वैविध्यपूर्ण शारीरिक कवायती उत्तम पद्धतीने सादर केल्या. शाळेतील प्रत्येक वर्गातील सर्वच्या सर्व विद्यार्थ्यांच्या एकत्रित सहभागातून कवायतींचे विविध प्रकार सादर करण्यात आले. त्यात योगासने, पिरॅमिड, सूर्यनमस्कार, शास्त्रीय नृत्य, समूह गायन, डंबेल्स, घुंगूरकाठी, लेझीम, एरोबिक्स आणि झुंबाडान्स इत्यादी प्रकारांचे सुसूत्रपणे आणि देखणे सादरीकरण विद्यार्थ्यांनी केले.
एमसीसी पथकाच्या शिस्तबद्ध संचलनाच्या सलामीने या कार्यक्रमाची सुरुवात झाली. कार्यक्रमाचे उद्घाटन माध्यमिक विभागाच्या शिक्षणाधिकारी निशादेवी वाघमोडे यांच्या हस्ते झाले. या प्रसंगी रत्नागिरी एज्युकेशन सोसायटीच्या कार्याध्यक्षा शिल्पा पटवर्धन, संस्थेचे पदाधिकारी आनंद देसाई आणि सुदेश प्रसादे हे उपस्थित होते.
‘आजच्या धावपळीच्या आणि व्यग्र जीवनशैलीत व्यायामाने मन व शरीर तंदुरुस्त राखणे अत्यंत गरजेचे आहे,’ असे प्रतिपादन निशादेवी वाघमोडे यांनी केले. विद्यार्थी आणि शिक्षकांच्या या विशेष प्रयत्नांचे त्यांनी कौतुक केले. शिक्षकांच्या सहभागाबदल त्यांनी समाधान व्यक्त केले. कार्याध्यक्षा शिल्पा पटवर्धन यांनी विद्यार्थी आणि पालकांच्या सहकार्याबद्दल समाधान व्यक्त केले. विद्यार्थ्यांना त्यांनी मोलाचा सल्ला दिला.